පසුගියදා මෙරටට ආනයනය කළ බිත්තර තොගයේ සෞඛ්ය සහතික වාර්තාව අද (13) දින නිකුත් කිරීමට බලාපොරොත්තු වන බව සත්ත්ව නිෂ්පාදන හා සෞඛ්ය දෙපාර්තමේන්තුව පවසයි.
තවත් බිත්තර මිලියනයක තොගයක් පසුගියදා මෙරටට අනයනය කළ අතර ඒවා වරායෙන් නිදහස් කරගැනීම සඳහා සත්ත්ව නිෂ්පාදන හා සෞඛ්ය දෙපාර්තමේන්තුවේ අනුමැතිය ලබාගැනීමට නියමිතව තිබුණි.
එම දෙපාර්තමේන්තුව විසින් පසුගිය සෙනසුරාදා දින අදාළ බිත්තර තොගයේ සාම්පල ලබාගෙන තිබූ අතර ඊයේ දිනය වනතෙක් ඒවා වරායෙන් නිදහස් කරගැනීම සඳහා සෞඛ්ය සහතිකය නිකුත් කර නොතිබුණි.
කෙසේවෙතත් මේ සම්බන්ධයෙන් අද දෙරණ කළ විමසීමකට පිළිතුරු දෙමින් සත්ත්ව නිෂ්පාදන හා සෞඛ්ය දෙපාර්තමේන්තුවේ අධ්යක්ෂ ජනරාල් ආචාර්ය හේමාලි කොතලාවල මහත්මිය පැවසුවේ එම බිත්තර තොගයේ සෞඛ්ය සහතිකය අද නිකුත් කිරීමට කටයුතු කරන බවය.
පසුගිය කාලය තුළ රටේ පැවති බිත්තර හිඟයට විසඳුමක් ලෙස රජය විසින් ඉන්දියාවෙන් බිත්තර ආනයනය කිරීමට පියවර ගනු ලැබීය.
ඒ යටතේ බිත්තර මිලියන 4කට ආසන්න තොගයක් මේ වනවිට ආනයනය කර ඇති අතර ඒවා හෝටල් සහ බේකරි කර්මාන්ත අතර බෙදාහැරීම සිදුකෙරේ.
ඒ අනුව පසුගිය සතියේ ගෙන්වූ බිත්තර තොගය ද හෝටල් සහ බේකරි කර්මාන්ත අතර බෙදාහැරිමට නියමිත අතර ඒ සඳහා ද මේ වනවිට ඇනවුම් බොහෝමයක් ඉදිරිපත් වී ඇති බව රාජ්ය වාණිජ විවිධ නීතිගත සංස්ථාව සඳහන් කළේය.
රාජ්ය වාණිජ විවිධ නීතිගත සංස්ථාවේ සභාපති ආසිරි වලිසුන්දර මහතා වැඩිදුරටත් පැවසුවේ එමෙන්ම ඉදිරි දිනවලදීත් රටේ පවතින බිත්තර හිඟයට පිළියම් ලෙස තවත් බිත්තර ආනයනය කිරීමට කටයුතු කරන බවය.
