ලබන 10වන සෙනසුරාදා වෙනුවට 13වෙනි අගහරුවාදා පාර්ලිමේන්තුව රැස්වීමට පාර්ලිමේන්තු කටයුතු පිළිබඳ කාරක සභාව තීරණය කර තිබේ.
කථානායක මහින්ද යාපා අබේවර්ධන මහතාගේ ප්රධානත්වයෙන් ඊයේ (05) රැස්වූ පාර්ලිමේන්තු කටයුතු පිළිබඳ කාරක සභාවේදී මෙම තීරණය ගෙන ඇති බව පාර්ලිමේන්තුවේ මහලේකම් ධම්මික දසනායක මහතා සඳහන් කළේය.
ලබන 10 වනදා පාර්ලිමේන්තුව රැස්වීමටත් එදින සම්පූර්ණ දිනය වාචික පිළිතුරු අපේක්ෂා කරන ප්රශ්න සඳහා වෙන්කිරීමටත් මීට පෙර තීරණය කර තිබුණි.
කෙසේවෙතත් ඊයේ රැස්වූ පාර්ලිමේන්තු කටයුතු පිළිබඳ කාරක සභාවේදී තීරණය වී ඇත්තේ 10 වෙනි සෙනසුරාදා වෙනුවට 13 වෙනි අඟහරුවාදා සම්පූර්ණ දිනය වාචික පිළිතුරු අපේක්ෂා කරන ප්රශ්න සඳහා වෙන් කිරීමටය.
ඊට අමතරව පෙර තීරණය කළ පරිදි ලබන 08 වෙනිදා පැවැත්වීමට නියමිත විසර්ජන පනත් කෙටුම්පත තෙවන වර කියවීමේ ඡන්ද විමසීම එදින පස්වරු 05ට පැවැත්වීමට කාරක සභාවේ එකඟතාව පළවී තිබේ.
ලබන 09 වෙනි සිකුරාදා දින එකතු කළ අගය මත බදු සංශෝධන සහ දේශීය ආදායම් සංශෝධන පනත් කෙටුම්පත් ද්විත්වය දෙවන වර කියවීමේ විවාදය පැවැත්වීමට නියමිත බව පාර්ලිමේන්තු මහ ලේකම්වරයා සඳහන් කළේය.
1979 අංක 61 දරණ අත්යාවශ්ය මහජන සේවා පනත යටතේ පසුගිය 03 වන දින ජනාධිපතිවරයා විසින් ප්රකාශයට පත්කළ ගැසට් පත්රයේ සඳහන් නියමය ද අනුමැතිය සඳහා ලබන 08 වන දින ඉදිරිපත් කිරීමට පාර්ලිමේන්තු කටයුතු පිළිබඳ කාරක සභාවේදී තීරණය වී තිබේ.
එසේම ලබන 13 වන දිනෙන් පසු නැවත ලබන වසරේ ජනවාරි 17 වන දින පාර්ලිමේන්තුව රැස්වීමට තීරණය කළ බව පාර්ලිමේන්තු මහලේකම් ධම්මික දසනායක මහතා වැඩිදුරටත් සඳහන් කළේය.
